Қозыбаев университеті мен Қытайдың Henan Agricultural Investment Capital компаниясы 18 қарашада аграрлық ғылым, технология және маман даярлау саласында бірге жұмыс істеуге келісті. Университет базасында екі елге ортақ аграрлық ғылыми орталық құру жоспарланып отыр.
Келісімге Солтүстік Қазақстан облысы мен Хэнань провинциясының бизнес-форумында қол қойылды. Ғылым және жоғары білім министрлігінің мәліметінше, жобаның алғашқы кезеңіне 20 млн доллар инвестиция салу көзделген.
Университет тәжірибелік егісті орталық ашылғанға дейін бастаған. Сәуірде оған 72,5 гектар жер бөлініп, мамырда алғашқы дақылдар егілді. Сынаққа жүгерінің 18, бидайдың төрт және рапстың бес сорты алынды. Енді мамандар егіс нәтижесіне қарап, өңірдің топырағы мен климатына қолайлы сорттарды анықтамақ.
Болашақ орталықта зертханалар, жылыжайлар мен оқу-тәжірибелік кешен салу жоспарланған. Онда студенттер мен жас ғалымдар селекция, тұқым шаруашылығы, су үнемдеу және дәлме-дәл егіншілік бағыттарында тәжірибе жинай алады.
Дереккөз: Қозыбаев университеті · ҚР Ғылым және жоғары білім министрлігі.
Көрнекі сурет: Nikolai Bulykin / Wikimedia Commons. CC BY-SA 4.0. Сурет сайтқа бейімделіп, WebP пішіміне ауыстырылды.
