«Отырар сазы» оркестрі жаңа маусымын «Күй-ұран» концертімен бастады. Кеш күйші әрі композитор Қаршыға Ахмедияровтың туғанына 80 жыл толуына арналды.
Екі композитордың туындылары орындалды
ҚР Мәдениет және ақпарат министрлігінің хабарлауынша, бағдарламаға Ахмедияровтың «Күй-ұран», «Қосбасар», «Ақмешіт», «Мама» және «Жұлдызым» шығармалары енді. Сондай-ақ Нұрғиса Тілендиевтің «Махамбет» поэмасы мен «Реквиемі» орындалды.
Тілендиев есімін иеленген академиялық фольклорлық-этнографиялық оркестрдің көркемдік жетекшісі — Дінзухра Тілендиева.
Оркестрге хор капелласы қосылды
Концертте Жалғасбек Бегендіков, Ерболат Ахмедияров және Әбілқайырхан Бейсеков дирижерлік етті. Кешке Б. Байқадамов атындағы Мемлекеттік хор капелласы да қатысты.
