Silk Way Star халықаралық музыкалық байқауының екінші маусымы Қытайдың CCTV-3 және CCTV-15 телеарналарынан көрсетіле бастады. Алғашқы шығарылым 6 қыркүйекте эфирге шықты. Қазақстан атынан қатысқан Рухия Байдүкенова «Бұлбұл» әнін орындап, бірінші турдың жеңімпазы атанды. Бұл туралы Қытайдың «Иу шанбао» газеті хабарлады.
Жаңа маусым Чжэцзян провинциясындағы Иу қаласының жаһандық цифрлық сауда орталығында түсіріліп жатыр. Жобаны Қазақстан Республикасы Президентінің Телерадиокешені мен China Media Group бірлесіп ұйымдастырады. Алғашқы шығарылым Қытай медиатобының цифрлық платформаларында да көрсетілді.
CCTV алғашқы конкурс кешінің аңдатпасында Рухияның өнерін жеке атап өтті. Телеарна әншінің күрделі вокалдық техниканы халық әніне тән әуезбен ұштастырғанына назар аударды. Бағдарламаның қытайша нұсқасында ән «夜莺», яғни «Бұлбұл» деген атаумен ұсынылған.
Әнші келесі өнер көрсетулерінде де көрерменді қазақ музыкасымен таныстыруды көздейді. Jibek Joly телеарнасына берген сұхбатында ол домбыра мен сыбызғының үнін танытып, көмеймен ән айту тәсілін қолданғысы келетінін айтты. Рухия он турдың жартысынан көбін осы ойға арнап, дәстүрлі қазақ әндерін жаңаша орындауды жоспарлап отыр.
Екінші маусымда он екі елдің әншілері бақ сынайды: Қазақстан, Қытай, Қырғызстан, Грузия, Малайзия, Түркия, Вьетнам, Оңтүстік Африка Республикасы, Ресей, Сербия, Бразилия және Жаңа Зеландия.
Маусым он тақырыптық конкурс кешінен тұрады. Қатысушылардың өнерін әр елден келген он екі кәсіби қазы және жүз адамнан құралған көрермендер алқасы бағалайды. Екі алқаның ұпайлары қосылып, әр шығарылымның жеңімпазы анықталады. Он турдың қорытындысында ең көп ұпай жинаған қатысушы бас жүлдені иеленеді. Бұл тәртіп CCTV жариялаған ережеде көрсетілген.
